संरक्षणको प्रतीक्षामा तिलौराकोटका ऐतिहासिक जोडी स्तूप

२८ भदौ, कपिलवस्तु । शान्ति, करुणा र अहिंसाका अग्रदूत भगवान् गौतम बुद्धको बाल्यकाल र युवावस्थासँग जोडिएका कपिलवस्तुस्थित तिलौराकोटका ऐतिहासिक जोडी स्तूप यतिबेला संरक्षणको पर्खाइमा छन्।

पुरातात्त्विक तथा धार्मिक दृष्टिले अत्यन्तै महत्वपूर्ण मानिएका यी स्तूपहरू बुद्धत्व प्राप्त गरेपछि कपिलवस्तु फर्कँदा माता मायादेवी र पिता राजा शुद्धोधनको स्मृति तथा सम्मानमा निर्माण गरिएको विश्वास गरिन्छ। तर समयमै उचित संरक्षण र व्यवस्थापन नहुँदा यी सम्पदाहरू घाँसपात र प्राकृतिक क्षयको चपेटामा परिरहेका छन्।

स्थानीय बासिन्दा तथा सम्पदाविद्हरूले विश्वसम्पदा सूचीमा सूचीकृत गर्ने प्रक्रियामा रहेको प्राचीन शाक्य राजधानी तिलौराकोट क्षेत्रभित्रका यस्ता महत्वपूर्ण जोडी स्तूपहरूको वैज्ञानिक संरक्षण तत्काल थाल्न सरोकारवाला निकायहरूसँग माग गरेका छन्।